Adil Vəliyev: Yüksələn gənclik Azərbaycanın gələciyini formalaşdırır

Təhsil millətin gələcəyidir. Bu sözü Ulu Öndər Heydər Əliyev əbəs yerə deməyib. Çünki bir millətin taleyi məhz təhsillə həll olunur. Bugünün təhsilli şagirdi, sabahın təhsilli tələbəsi, həkimi, müəllimi, mühəndisidir.
Azərbaycan dövləti təhsilin milli inkişafın əsas təməl daşı olduğunu dərk edərək, gənclərə həm ölkə daxilində, həm də xaricdə yüksək keyfiyyətli təhsil almaq imkanı yaradır. Bu məqsədlə son illər ərzində dövlət tərəfindən mühüm proqramlar həyata keçirilmiş, gənclərimiz dünyanın aparıcı universitetlərinə göndərilərək orada müasir elmi biliklərə və praktiki bacarıqlara yiyələnmək şansı əldə etmişlər. Onların inkişaf etmiş ölkələrin qabaqcıl təcrübəsini öyrənməsi və təhsil aldıqları sahələr üzrə peşəkar mütəxəssis kimi formalaşaraq Vətənə geri dönməsi, Azərbaycan cəmiyyətində intellektual potensialın güclənməsinə, təhsil sistemində yeniliklərin tətbiqinə və eyni zamanda iqtisadiyyatın müxtəlif sahələrinin dirçəlməsinə mühüm təsir göstərəcək. Bu proses, həmçinin ölkənin qloballaşan dünyada rəqabətqabiliyyətli mövqe tutmasına zəmin yaradır və milli kadr potensialının strateji inkişafını təmin edir.  Nəzərə alsaq ki yeni nəsil gənclər karyeralarını artıq tələbə olduqları zamandan qurmağa başlayırlar, bu ona əsas verir ki,təhsilli və məqsədli gənclər gələcəkdə yalnız özlərini deyil, həm də cəmiyyətin rifahını formalaşdıran əsas qüvvəyə çevrilirlər. Artıq tələbəlik dövründən şəxsi inkişaf planı quran, ixtisası üzrə təcrübə toplayan və əmək bazarının tələblərini izləyən gənclər, karyera yollarını daha məqsədyönlü şəkildə qururlar. Bu da o deməkdir ki, onlar universiteti bitirəndə artıq müəyyən bir sahədə bacarıq və təcrübə qazanmış, əmək bazarına hazır və rəqabətqabiliyyətli kadrlar olurlar.
Beləliklə, təhsilin keyfiyyəti və gənclərin karyeraya erkən inteqrasiyası, ölkənin iqtisadi, sosial və texnoloji inkişafında mühüm rol oynayır. Azərbaycanın müxtəlif sahələrdə qabaqcıl mövqe tutması üçün bu cür gənclərə ehtiyac var və dövlətin təhsilə göstərdiyi diqqət, məhz bu gələcəyin formalaşdırılmasına xidmət edir.Təhsil təkcə bilik qazanmaq vasitəsi deyil, eyni zamanda şəxsiyyətin formalaşması və peşəkar karyeranın təməlidir. Müasir dövrdə uğurlu karyera qurmaq üçün yalnız nəzəri bilik kifayət etmir, eyni zamanda analitik düşüncə, kommunikasiya bacarıqları və texnoloji biliklər də tələb olunur ki, bütün bunlar keyfiyyətli təhsilin nəticəsində formalaşır. Tələbələr təhsil aldıqları müddətdə həm akademik biliklərlə, həm də müxtəlif layihə və təcrübə proqramları vasitəsilə əmək bazarının real tələblərinə uyğun bacarıqlarla silahlanırlar. Bu isə onların gələcəkdə seçdikləri peşədə uğurlu olma şansını əhəmiyyətli dərəcədə artırır.
Nəticə etibarilə, təhsil və karyera bir-biri ilə sıx bağlı olan iki əsas sütundur və bu sütunlar üzərində yüksələn gənclik Azərbaycanın gələcəyini formalaşdırır.

Adil Vəliyev, ixtisas seçimi və karyera üzrə mütəxəssis