İsmayıllı rayonunda “14 iyul – Ulu Öndər Heydər Əliyevin siyasi hakimiyyətə gəlməsinin 57-ci ildönümü” münasibətilə “İradənin zəfər çaldığı gün: Tarixi bir başlanğıcın izi ilə” adlı tədbir keçirilib

14 iyul tarixində İsmayıllı rayon Heydər Əliyev Mərkəzində “14 iyul – Ulu Öndər Heydər Əliyevin siyasi hakimiyyətə gəlməsinin 57-ci ildönümü” münasibətilə “İradənin zəfər çaldığı gün: Tarixi bir başlanğıcın izi ilə ” adlı tədbir keçirilib.

Tədbir Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Qəbələ Regional İdarəsinin İsmayıllı rayonu üzrə nümayəndələrinin, İsmayıllı rayon Heydər Əliyev Mərkəzinin və İsmayıllı rayon Mərkəzləşdirilmiş Kitabxana Sisteminin birgə təşkilatçılığı ilə reallaşıb.

Tədbirdə Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Qəbələ Regional İdarəsinin İsmayıllı rayonu üzrə baş mütəxəssisləri, İsmayıllı rayon Heydər Əliyev Mərkəzinin və İsmayıllı rayon Mərkəzləşdirilmiş Kitabxana Sisteminin rəhbər və əməkdaşları iştirak ediblər.

Tədbir iştirakçıları Mərkəzin ekspozisiya zalında Ulu Öndərin zəngin irsini əks etdirən fotostendlərlə tanış olaraq, dahi şəxsiyyətin keçdiyi keşməkeşli, lakin şərəfli həyat yoluna nəzər salıblar.

Tədbir Ulu Öndər Heydər Əliyevin və Azərbaycanın ərazi bütövlüyü uğrunda şəhid olmuş qəhrəmanların xatirəsinin bir dəqiqəlik sükutla yad edilməsi ilə başlayıb.

Daha sonra tədbir iştirakçılarına Ümummilli Liderin Azərbaycan naminə çəkdiyi fədakar zəhmətə həsr olunmuş “Liderin ürəyi” sənədli filmi nümayiş etdirilib.

Tədbirdə çıxış edən natiqlər bildiriblər ki, 14 iyul tarixi xalqımızın milli özünüdərk və dövlətçilik şüurunun oyanışında dönüş nöqtəsidir. Ulu Öndərin siyasi hakimiyyətə gəlişi ilə respublikamızda başlayan intibah dövrü, yalnız iqtisadi-mədəni yüksəlişin deyil, həm də müstəqilliyə aparan mürəkkəb yolun etibarlı təməlini qoymuşdur. Natiqlər vurğulayıblar ki, Ümummilli Liderin formalaşdırdığı bu güclü dövlətçilik fəlsəfəsi bu gün də əsası qoyulmuş strateji xəttin davamlılığını və Azərbaycanın beynəlxalq nüfuzunun sarsılmazlığını şərtləndirən başlıca amildir.

Tədbirin məqsədi Azərbaycanın müstəqillik yolundakı şanlı tarixini gənc nəsillərə çatdırmaq, Ümummilli Liderin xilaskarlıq missiyasını dərindən dərk etmək və vətənpərvərlik ruhunu gücləndirməkdir.

Ulu öndərin siyasi irsi bizim üçün həm keçmiş, həm də gələcəyə aparan işıqlı yoldur. Onun yolu ilə irəliləyən Azərbaycan isə hər zaman qalibdir!