"Vətən Bağı"ndan tarixi məktəbə Təbrik Məktubu

"Vətən Bağı" Sosial Təşəbbüslər İctimai Birliyinin sədri Emin Tarverdiyev 18 Sentyabr – Milli Musiqi Günü münasibətilə Naxçıvan Şəhər Məmməd Məmmədov adına 1 nömrəli Uşaq Musiqi Məktəbinin direktoru Vüsalə Əmiyeva-Kəngərliyə, məktəbin pedaqoji kollektivinə və şagirdlərinə təbrik məktubu ünvanlayıb.

Emin Tarverdiyev təbrikdə təhsil ocağının Azərbaycan musiqi tarixində tutduğu müstəsna yeri xüsusi qeyd edib. O bildirib ki, 1937-ci ildə təməli qoyulmuş bu məktəb muxtar respublikada peşəkar musiqi təhsilinin institusional təməlini qoyan zəngin mədəniyyət məbədidir. Məktəbin yaranması dahi bəstəkar Üzeyir bəy Hacıbəylinin adı və xeyir-duası ilə sıx bağlıdır. Üzeyir bəyin 1937-ci ildə məktəbə hədiyyə etdiyi "Berlin" markalı fortepiano bu gün də tarixi və mənəvi miras kimi qorunub saxlanılır.

Təbrikdə həmçinin vurğulanıb ki, Nəriman Məmmədov, Ramiz Mirişli, Yaşar Səfərov, Kamal Əhmədov, Nazim Kazımov, Əkrəm Məmmədli və İlqar Muradov kimi görkəmli sənətkarları yetişdirən məktəb milli musiqi xəzinəmizə əvəzsiz töhfələr verib. Müharibə və blokada illərində də fəaliyyətini saxlayan təhsil ocağında çalışan 60 nəfərlik pedaqoji heyətin böyük bir qisminin məhz onun öz məzunlarından ibarət olması nəsillərarası peşəkar davamlılığın bariz göstəricisidir.

Sonda Birlik sədri 2027-ci ildə 90 illik yubileyini qeyd etməyə hazırlaşan və hazırda 240-dan çox şagirdə 11 ixtisas üzrə təlim verən məktəbin kollektivinə Vətənimiz və milli mədəniyyətimiz naminə müqəddəs fəaliyyətlərində yeni-yeni yaradıcılıq nailiyyətləri arzulayıb.